أولى إصلاحات الحكومة الجديدة: الإطاحة بكل من أراد العيش بكرامة
 

 

نشرت الناشطة " غنى عبدو" عبر حسابها على الفايسبوك عن بائع الكعك في شارع الحمرا، بعد أن أزالوا له عربته وتركوه على طرف الطريق دون أي رحمة.

مين منا اشتغل بالحمرا او حتى مرق مرقة طريق وما مرق اشترى كعكة من عمو أبو علي.. وكان اول كلمة يقلك ياها ما معك مصاري عمو روح منا أزمة بس تتسهل بتعطيني.. عن ألف ليرة عم يحكي اي عن الف ليرة!!! 

مين منا ما صبح عأبو علي بكلمة صباحو ورد عليه "يحميك الله صباحك ورد"..

مين منا ما بيحب هيدا الزلمي الختيار اللي ضحكتو معباية شارع الحمرا..

اليوم مرقت بنفس الطريق اللي صرلي بقطعوا ٣ سنين كان الشارع فاضي، بلا لون، بلا حياة، معقول عرباية خشب مع زلمي ختيار بتعطي كل هالحب وكل هالدفا.. 

اليوم صباحي وصباح كتار ما كان ورد كان غصة..

أمرت الدولة يشيلوا عرباية الكعك لإنها مخالفة هني ما شالوها! هني كسروها لإنو فقير وباب رزقة ما عندو غيرا..

هيك نحنا ببلدنا منقتل الفقير ممنوع يعيش الفقير.. قلي عمو ابو علي وهو عم يبكي "هني ما كسرولي العرباية بس هني بحشو يا بنتي ودفنوني، طمروني طمر"

اقرأ ايضاً: كيف سقط الإعلام في قضية مستشفى الفنار

عمو أبو علي، ٦٣ سنة مريض سكري وضغط وقلب كل ذنبو انو لبناني اي انك تكون لبناني هيدا ذنب..

بكي عمو ابو علي ونزلو دموعو عخدودو التعبانين بكي بحرقة وقلي "اي بلد هيدا اللي ما بيحمي رجالو وولادو انا ما بدي آكل لأ بس ما بدي نام بالطريق ما حدا حيرحمني.. "

داب قدامي قهر وبقلبو الف غصة، كان قاعد عكرسي حزينة محل ما كان يوقف بس بدون العرباية بدون باب رزقو

وحيد ومكسور كسرني ضعفو قهرني وكانت العالم عم تمرق تسلم عليه وتسألو وين الكعكات يا عم كان عم يرد عليهن خلص راحت العرباية..

راحت العرباية وراحوا الكعكات ويمكن يروح عمو أبو علي حسرة هالشي اللي اسمو محاربة الفساد..  يا ريت نستقوي عالشياطين الكبار ونترك هودي العالم الضعاف بسلام!

وفي اتصال من موقع لبنان الجديد مع العم "أبوعلي" نسأله عن وضعه وبأننا سنطلق حملة، بالتعاون مع الناشطة غنى، نجمع فيها مبلغ من المال لمساعدته في تحصيل رخصة ودعمه في إيجار منزله، وادويته، لكن عزة نفسه أبت إلا من مساعدته في الرخصة قائلاً:" بس يمشي الشغل وما بدي شي". 

 

وللمساعدة الرجاء الرجاء التواصل مع الأرقام التالية:

موقع لبنان الجديد: 01301555 الناشطة غنى عبدو: 70610937 الناشطة زينب إبراهيم: 71302713