قبل الدني بنهار
كان الوقت ختيار
وكان القمر حاني
حامل قلم
عم يكتب الاشعار
عم يغازل النجمة
ويكبِّلا الورقة
اللي مخبي
بها الاسرار
يحكيلا عن حبو
وغرامها اللي صار
متملك بقلبو
بعد الدني بنهار
صار الزمن غدّار
وقتها خلقوا البشر
ولوَّثوا كل الدني
وتبدلت الأدوار
وتغيرت كل الملامح
وسكن الغدر المطارح
وحلّت الظلمة
وهاك النجمة الكان
يغازلها القمر
فارقت ضهر السما
وهجرت هاك الدار
والقمر لونو شحب
وفارق عيونو الغفى
وإنطفيت الأنوار
وإتبدلت الدني
بغير الدني
وإنتهى المشوار