من انا وصغير عندي علاقه خاصه مع الله ، و بعشقه لاني بكل نفس و بكل ثانيه بشوف و بلمس قديه هو بيحبني و كريم معي ، و ما عندي شي اسمه حلال و حرام ، بس كتير بعرف ميّز الصح من الغلط ، و اكيد مش معناها اني ما بغلط بس بحاول قدر الامكان كون انا الطرف المتأذي من الغلط مش غيري .
انا وصغير بالحضانه كانت الراهبه تشدد علينا نغسل ايدينا قبل ما ناكل و بعد ما ناكل، اليوم انا عم بلعب نفس الدوّر بس بالعكس، صرت عم شدد على ولادي يغسلوا ايديهم بميّ معدنيه من بعد ما يغسلوا بميّ الحنفيه، مش لأني برجوازي، بالعكس، بل لأني ما قادر طببهم إذا نصابوا لا قدر الله بشي جرثومه من هالسم يلي عم يغسلوا إيديهم فيه.
لا هيدا لون ميّ و لا هيك بيكون طعمة الميّ و لا لونها.
بتمرق بهالشوارع بتشوف الرايات السود بلشت تنتشر و شعار ( ما تركناك يا حسين ) كتير لفتني ..
اسمعوا يا اخواتي ، فيكم تسبوني لتشبعوا او تكفروني او تعتبروني عميل او اي تابع لسفاره ، انتوا حرين متل ما انا حرّ قول يلي بدي ياه ...
بتعرفوا إذا بيظهر المهدي اليوم شو اول شي بيعمله؟
بدو يوّلع هالخيّم السودا فيكم و يكسرها على راس هالشيوخه يلي عم تجمعكم لتبكيكم على مصيبه الحسين و تنسيكم مصيبتكم و الظلم و الذل و الفوضى يلي انتوا عايشين فيها .
الحسين كانت ثورته على الظلم .
الحسين بنص معركته بأرض كربلاء اقام الصلاه، لبلوزه السودا ما بتغني عن الصلاة .
الحضور بالجامع اهم من الحضور بالمجلس العاشورائي .
تأمين ميّ نضيفه و طاهره لولادك اهم من توزيع الراحه و البسكوت .
انك تصرخ و تخزق حنجرتك انت و عم بتطالب بعيشه شريفه لعيلتك اهم من إنك تلعن يزيد .
ايام الحسين كان في يزيد واحد .
كم يزيد في حولك ؟
كم يزيد حاكمك ؟
كم يزيد عن يتحكم بلقمة ولادك ؟
بدكم تنسوا كل هاليزيدين و تقعدوا تلعنوا يزيد يلي مات من 1500 سنه .
هيك الحسين فكركم بيكون راضي ؟
هيك الرسول و الامام علي بيكونوا راضيين ؟
هيدي التجمعات و المسيرات إذا بتنزلوا فيها على الشوارع ضد الفوضى و الذل و لأمراض و الميّ و الكهربا و الدوا و التعليم و ضد نهب المال العام و استرداد الاموال من الوزرا و النواب و استرداد الاملاك العامه يلي صارت بأسم ولادهم و نسواهم مش افضل ما انكم تنزلوا مسيرات ضد يزيد ابن معاويه.
مش الامام الحسين بيقول:
«إني لم أخرج أشراً، ولا بطراً ولا مفسداً، ولا ظالماً، وإنما خرجت لطلب الاصلاح في أمة جدي، أريد أن آمر بالمعروف وأنهي عن المنكر فمن قبلني بقبول الحق فالله أولى بالحق، ومن رد علي هذا أصبر حتى يقضي الله بيني وبين القوم بالحق، وهو خير الحاكمين»
إذا بدكم تكونوا حسينيين هيدا الحسين
اما إذا بدكم تمارسوا فولكلور باللباس الاسوّد انتوا حرين .
و على فكره .. تحرير برج البراجنه من تجار السيلفيا و عصابات الخوات أحق من تحرير القدس، من يومين ، نهار السبت، شوفير تكسي شلحوا كل شي بيحمله بحيّ الجوره بالبرج، طلع على الحاجز عم يستنجد، قله العسكري انا ابن دوله و سلاحي معي و بخاف فوت بهالشارع ؛ انت شو اخدك.
خلص..
خلص
لكم حسينكم و لي حسيني.
فضل كنج