أعربت الممثلة ندى بو فرحات عن سخطها لشغور منصب رئيس الجمهورية في لبنان منذ نحو عامين، معددةً الازمات التي مرت بها شخصياً، اضافة الى المصائب العامة في الوطن.
وكتبت بو فرحات تدوينة طويلة عبر حسابها الشخصي على موقع "فيسبوك" تحت عنوان "طفح الكيل"، وجاء فيها:
"*ماتوا أعز أصحابنا بحوادث سير بسبب حالات الطرقات بلبنان وبوقتا، كان في رئيس جمهورية.
*مشاريع فرز النفايات وإعادة تدويرها ممنوعة من التنفيذ، من وقت ما كان في رئيس للجمهورية.
*مشاريع الطاقة الشمسية لإنتاج الكهرباء مطفايي، من إيام رئيس الجمهورية.
*من بيتي ببيروت لشغلي ببيروت بتاخد نص نهار روحة رجعة من وقت ما كان في رئيس جمهورية.
*خالتي انسرقت واندبحت بدكانا والمجرم عم يسرح ويمرح عوقت ما كان في رئيس جمهورية.
*اللبناني بعدو بيمشي عالإشارة الحمرا وبدوبل صف ثالث بالعجقة من وقت ما كان في رئيس جمهورية.
*الخضار عم يختفي والتعصب كاسح البلد من وقت ما كان في رئيس جمهورية.
*حاج تتحججو بالفراغ لتخفوا فسادكن!
*يا ريت منطالب بتعباية الفراغ الموجود بالأدمغة اللي وصلت لبنان لحالتو!
*آخ يا بلدي شو إنك بحاجة لدم جديد! لعقل منطقي متطور مسالم وسليم!
*آخ يا لبنان شو خرجك الانفتاح والسياحة وشعب بيعرف قيمتك!
*شو خرجك شعب بطالب بحقوقو مش بحقوق زعيمو!
*شعب بخاف عليك من وحشية العقول المغلقة!
*آخ شو بحبك يا لبنان، لبناني إلي، لبناني اللي بحلم في!"