فخامة رئيسنا القوي يصرح انو بدءًا من شهر تشرين القادم سوف نبدأ بإصلاحات تنعش البلد وتحقق نمو مرتفع...

شو حلوة هالقصيدة فخامتك للي تزامنت تحديدًا مع مؤتمر بالغ بالثقافة البيئية والحضارة الخطابية لدونجوان وزاراتك الفوق الطبيعية الخلوق فادي جريصاتي.

وزير البيئة يطلب من اللبنانيين انو يسكرو بوازن إذا ما عم يفرزو، يعني نفس الحل للي عطاه ملك جمال لبنان من سنتين. هاها بتتذكروا؟ 

هيدا وزير بيئة الو الحق انو يتظاهر عشعبو ويعتصم، ويقول ما تسمعني صوتك، لك انت يا شعبي اذا اختنقت من الريحة وصار معك سرطان واوبئة وتلوث من الجو والبر والبحر

ما تسمعو صوتك لفادي جريصاتي اذا ما عم تفرز ببيتك، لك لازم تسكر نفسك كمان، هيدا وزير أفكارو حبيبي من الفضا، هيدا وزير مش من عصرنا

هيدا الوزير من العصور للي جايي اي عهد قوي اي عهد قوي، هيدا يمكن مبعوث بالغلط على ارض وطنا من القرن ال٢٢، 

هيدا وزير عم يعمل environmental policies ويدرّسا برا لهيدي السياسات البيئية، اسما السياسة سكر بوزك اذا مش عم تفرز. 

سياسك بيئية من خمس كلمات سكر- بوزك - اذا مش -عم تفرز...وبنبرة عالية كمان.

طيب هيك مستوى عالي من ااسياسيات، كيف بيقدر الشعب اللبناني يفهما، الIQ عالي يا جماعة، مين نحن لنستوعب عليه لوزير البيئة.

هيك بعاملكن جبران باسيل باجتماعات التيار؟ هاها  اما سمعة: سكر بوزك اذا مش عم تفرز.

طيب معاليك، واذا كنا عم نغطي تدمير اودية لبنان، ونغطي عالكسارات بغطاء سياسي، ونحرق سلاف الثروة الطبيعية بمرج بسري شو لازم نعمل؟ آه؟ قلي شو لازم.

كيفو الكوستا برافا، ومطمر برج حمود، ودخان الذوق، وزبالة الكرنتينا، شو وضعن هودي؟؟ منسكر بوزتا كمان وما منسمعك صوتنا.

على كل حال بي الكل وعدنا باصلاحات تنعش البلد من اول  الشهر الجايي، ويا عين من هيك اصلاحات بلشت بجرصة كبيرة من. جريصاتي عنوانا سكر بوزك واختنق اذا مش عم تفرز....

وانت يا وزير البيئة لازم تفرز شوي لأن تماديتو بالطغيان والغرور عشعبكن ومعتبرين شعبكن طابة بملعبكن وبتسكرولو بوزو ساعة للي بدكن وبتقولوا هتوف بحياتكن ساعة للي بدكن 

والله يقويكن عشعبكن، نشالله تقدرو تتحملوا الشغب مسيو جريصاتي، يعني بدك ما تواخذنا، شو هالشعب للي ما بيفرز

خبر الريس باسيل تبعك انو صار لازم تنزلوا عالشارع وتتظاهرو ضد حالكن، وشغلة اخيرة قبل ما انسى: سكرو بوزكن اذا ما قادرين تفرزو.