نق فليكس ١٩
طيب خطاب السيد بمهرجان نصر وكرامة كان كلو عنفوان والدليل إنو ما سمعنا يا جماعة ولا جملة من سماحتو عن بيان السفارة الاميركية بقضية قبرشمون...
يعني من اسبوعين بحفل تكريم جهاد البناء سمعنا التصعيد بقضية قبرشمون وانو لا يمكن الذهاب الى حكومة إلا ما ينعقد المجلس العدلي
طيب سماحتك ليش ما قلتلنا تبريرك بهطاب النصر والكرامة لتراجعك عن رأيك بهيدي القضية أو حتى استنكار لتدخل عوكر للي دايمًا بتدينا بهيدي القضية.
وبعدين يا أيها القائد الأعظم والاعتدالي الأرفع، حضرتك تكلمت بحرص ورصانة على الطوائف الكريمة الدرزية والمسيحية والسنية، وشجعت على الاختلاف وعلى وجود أبواب متفرقة ومداخل متعددة لكل طايفة كريمة...
والتنافس بما يرضي مصلحةالعامة، بس إنو بالطايفة الشيعية ليش الاستهزاء من المعارضين بهالطريقة المفرطة واعتبار انو ما في غيركن ممثل لهالطائفة،
وانو اي حدا شيعي مناضل معارض يفرجينا تمثيلو بالشارع،
ايه يا عزيزي لما تخسر حوالي ٣٠ الف صوت ببعلبك الهرمل لصالح لايحة تانية، بكون الآخر بالون منفخ؟
هيدي الانتخابات الماضية للي حتى الأموات عندكن قاموا انتخبوا وصناديق طارت وصناديق حطت ومع ذلك خسرتو مقعدين
وبالمقاعد للي ربحتوها الجمهور الشيعي وجّه وصوّب صوتو لحدا غير منتمي للثنائي الشيعي بلايحتك اللواء جميل السيد للي لحالو جاب تلات حواصل
فكيف بيطلع معك انو وحدكن الممثلين بالساحة الشيعية،
يعني عنجد لو المعارضة الشيعية بتتقاضى عشرات ملايين الدولارات، بالمنطق يا سيدنا كنا صرنا زملاء لنوابكن بالمجلس وعلى بساط احمدي...
إنت للي بتعرف إنو المعارضة الشيعية يتيمة، وما فيها وراها لا عُرْب ولا أميركان ولا من هم يحزنون
والناس كلّا بتعرف القصور والمزارع للي بيمتلكها كبار المسؤولين بينما القاعدة الشعبية ممغوسة بالوسخ والفقر والذل مش بالكرامة...
على كل حال، احتكار الطايفة الشيعية بحضرتكن اذا بدو يقطع معنا على اعتبار معاييركن التمثيلية، كيف بدا تقطع مع الخلق والبشر احتكار صفة المقاومة
وإنتو لغيتو من الأعلام الكريمة أعلام الحزب القومي السوري الاجتماعي والحزب الشيوعي وجبهة المقاومة الوطنية اللبنانية للي كانوا أول من قدّموا شهداء
وكانوا خزان الدم في كل حروب لبنان مع إسرائيل؟؟
فكيف شكل يا أخوانا بالحزب وإنتو للي بتتمنوا إنو تلتف حولكن جميع الاحزاب في سبيل هذه القضية النبيلة؟
ما إنتو فرمت الأحزاب فرم...
وللي محير البشرية سماحتك، هوي الشخص للي قلت عنو انك بتعرفو .... هيدا الشخص للي
دايمًا بيسفق تصاريح ومن قناة لقناة يطلق مواقف
هيدا الشخص للي حتى السائق تبعو موظف عندو وما بآمن في؟
هيدا كلام خطير جدًا.، مين هالسائق؟ وليش التركيز على هيدا الشخص المعارض؟
سماحتك انت للي بتخاطب ترامب وبومبيو واولمرت واوباما وحالوتس ومالوتس، لتجي توجه خطابك لشخص عندو سائق، مش كأنو غريبة شوي؟؟
بنهاية المطاف، انا أبصم لكم انو الشيعة في للبنان هم أنتم وحدكم، اكيد انتم ولا احد، وانا وافقت والكلام طابو...
مشان هيك شيعة بعلبك الهرمل اصبحوا من دون مقومات لا كهرباء ولا مؤسسات رسميه ولا فرص عمل .ولا ولا...
اهل البيت (عليهم السلام) كانوا خدم للانسان وبعمرن ما تباهوا بالحكم .
عندما سُئل الامام علي عليه السلام .قال .هذا الحذاء افضل من امارتكم اذا بحيي حق والغي باطل
فشكرا سماحة السيد شكرا شكرا