الMTV للي انذلت وتسكرت ٨ سنين على إيد النظام السوري وأتباعه وشبيحته تسقط مرة أخرى في فخّ الذل والتملق بتقبيل راس علي الديك.
إيه يا علي الديك نحن ما بحقلنا نحكي عن رئيسك، بس واجبنا نروّح ٤٠٠٠ شهيد لبناني بالقصير ويبرود وكسب وبلاد ما بين البراميل كرمال يبقى رئيسك.
إيه يا علي الديك نحن ما بحقلنا نحكي عن بلدك، بس نسيت إنو بلدك وضباطو نكلوا بشعبنا وحكمونا بالصرماية ١٥ سنة واستولوا على أرضنا ونظامنا وشعبنا واغتالوا رؤوساءنا.
إيه يا علي الديك نحن ما بحقلنا نحكي عن بلدك، بس مجبورين نآوي ٢ مليون لاجئ سوري وطبعًا مش عم مننك، هيدا واجبنا كدولة شقيقة، بس واجبك تحترم الرأي اللبناني المناهض مش تقوم تاخد موقف كرمال ما يزعل رئيسك وتبيعو مواقف إنو"شوفيني يا منيرة".
إيه يا علي الديك الروسي والممانعة والنظام السوري تحديدًا هوي للي باع "الجولان" للإسرائيلي بأبخث تَمَن وهوي وعم يضحك ويلعب.
لو السوري شغل جيشو الباسل للي ٨ سنين هوي وعم يقاتل ببلدو حفاظًا على نظامو العظيم لو شغل جيشو وبراميلو ما كان الإسرائيلي أعلن رسميًا أن الجولان جزء من كيانو الغاشم.
يا علي الديك صرنا بعصر منعطي براءة ذمة في للإسرائيلي ومش شايفين غير داعش عدو.
إيه يا علي الديك عم لوم السوري والممانعة وما عم لوم العرب للي already باعوا القضية من زمان ولأنو كنا مفكرين عنجد إنو بعد ما العرب قبلوا بالسلام مع إسرائيل... الوحيدة سوريا وحزب الله رح يوقفوا بالمرصاد بس يا حسرة يا علي الديك طلعوا كلن متل العرب ولك حتى الخطاب صار خطاب هزيل نحيل خالي من التهديد والوعيد لا عند قائد الممانعة ولا عند الأسد ، وجايي عم تعطي محاضرة يا علي الديك إنو الأسد بيّك، لك حبيبي يا علي الديك الأسد الحقيقي ما بيترك ولا ولد من ولادو بإيد مغتصب، وهيدا الأسد طيّر الجولان وعلى العروبة السلام.