سألني صديق فايسبوكي : لماذا هذا الحقد على رياض سلامة ؟!
وهذا كان جوابي : "حقد ؟ أعوذ بالله ! لا بعرفو ولا بيعرفني. لا أريد منه شيئاً وليس بيننا تضارب مصالح إطلاقاً. ما حصل أن رياض سلامة وزع 5.5 مليارات دولار على اصحاب البنوك السنة الماضية بحجة انها "هندسة مالية" وعلى شكل "فوائد مدفوعة مسبقاً" بنسبة 100 بالمية (١٠٠%) . يعني تخيل انك كبنك تجمد مليون بالدولار ويفوت بحسابك مليون تاني فوراً . طبعاً أصحاب الأموال حصتهم 30- 40 بالمية . اعلى فايدة بالعالم وتاريخ لبنان. ايام رفيق الحريري اول ما وصل عمل هيك شي انما كان عندو مخطط اقتصادي هائل للبنان، ما زبط، هذا غير موضوع. رياض سلامة ما عندو مشروع برأيي غير يبقى حاكم ل30 سنة. قدم بهالهندسة رشوة للطبقة السياسية اللي جددت الو بالإجماع ومن دون اي اعتراض . "التيار العوني" اعترض ورجع سكت لما دخل 50 مليون دولار على حساب "سيدروس بنك" من المال العام، ولما أخد مجلس إدارة كازينو لبنان رئيساً وأعضاء. حتى المعارضة التي تفتش عن سرقة من المال العام بألف دولار بالفتيلة والسراج سكتت. (لازم ارجع لكتاب فواز طرابلسي عن السياسيين وتوزع الثروات بلبنان لإفهم سكوتُن). لكن أفظع شي حجة انو في بنوك اصيبت بخسارات كبيرة باستثماراتها بالخارج ولازم المصرف المركزي يساعدها . ليه بدنا نساعدها من حساب اللبنانيين عمرها ما ترجع . هلق عم يقولو انتهى مفعول ال5.5 مليار دولار وبدو يوزع 4 مليارات جداد.
ما بحياتي حقدت على حدا . انما بشوف يللي صار وعم يصير سرقة موصوفة وما بعرف كيف إلن قلب. ب5.5 مليار دولار كنا قضينا على الفقر بلبنان. لو وزعها قروض ميسرة على اصحاب مشاريع ومؤسسات زغيرة كانت استفادت 55 ألف مؤسسة . تخيّل . 55 ألف مؤسسة يعني ما كان بقي حدا بلا شغل بلبنان.
بس أكيد بشعر بغضب كلما فكر بهالموضوع. وبعرف أن الإعلام صنع من هذا الرجل أسطورة لقاء المال، هبات كبيرة لأشخاص وقروض ميسرة بملايين الدولارات. وكيف لا أحزن عندما ولا سياسي ولا حزب ولا وسيلة اعلامية بتحكي شو عم يصير فعلا.
صباحك خير وفرح رغم كل شي بهالبلد المسكين".