بعد أسبوع من وقوع الجريمة المُفجعة التي أودت بحياة الشاب روي حاموش، قرر صديقه الذي كان برفقته في تلك اللحظة المشؤومة وشهد على ما جرى ان يخرج عن صمته ويكشف النِقاب عن ملابسات الجريمة.
جوني نصار، روى بالتفصيل اللحظات الأخيرة التي عاشها مع روي في شريط فيديو نشرته الاعلاميّة زينة باسيل شمعون على صفحتها، وقال: "تنتظرون مني ان اخبركم بالتفاصيل المُملة ما جرى معنا في تلك الليلة، لكنني سأخبركم عن شعورنا وقتها. "نحنا وهربانين حس عليي روي اني مزعوج طلع فيي وقلي خيي جوني ما تعتل هم السيارة شكلها ما بها شي مُهم هلق نكفي، خلينا هربانين وبعد شي 15 ثانية ما بعرف شو بحس متل خوف موجود بقلب السيارة قلت لازم طمن روي، قلتلو خيي روي ما تقول عن جبناء، الف كلمة جبان ولا كلمة الله يرحمو فرد عليي بكلمتو يلي بقلنا ياها اكيد خيي".
واضاف: "ما ضروري قلكن شو صار ولا شو حسينا بس كان الرصاص عم ينزل علينا متل الشتي والرعب يلي بتحسو بس ينرفع الفرد بوجك وتحس حالك عاجز منك قادر تعمل شي وبس ما يطلع الضرب اضطرت انزل من السيارة قلو يا زلمي روق شو عم تعمل كرمال ضربة سيارة بدك تقتلنا .. بشوفو بهل اللحظات عم يعبي مشطو الثاني لبتذكرو بس وصلو عليي الدرك طلعت علين مفجوع اول سؤال رفيقي وين روي وين دقيتلو مرتين ما رد وكنت بعدني عم قول براسي مستحيل يكون روي ميت مستحيل يكون المجرم قوصو يلي بشوفو لروي مستحيل يقوصو".
ووجه رسالة اعتبر فيها: "ان المجرم لا يميز، لقد شبعنا ذلاً ومن الانحناء امام الازعر لأنه يحمل سلاحاً. شبعنا العيش في بلد يربي المواطن على ثقافة السلاح والتفلت التي تؤدي الى الخراب. شبعنا وعوداً بمستقبل أفضل في ظل الخوف الذي يتهدد الشباب، والذي يحول حياتهم الى فيلم رعب".
وأكمل كلمته قائلاً : "لعشناه انا وروي في قلو الله بالسماء، ويا خيي روي ما بعرف شو بدي قلك ما بحياتي تخيلت كون واقف هون عم بحكي كلمة عن راحة نفسك خاصة اذا خسرناك بهالطريقة البشعة وكنت معي بالسيارة".
وتوجه لروي بالقول: انا بعرف روحك بالسماء ومتأكد، اذا انت مش بالسماء ما حدا منا بيستاهلا للسماء"، وختم:"حتى لا يكون موت روي ذكرى، بدي قلك عبارتك الشهيرة "انت خيي" والله يرحمك".
كلام جوني جاء خلال مشاركته في "وقفة صلاة وصرخة رجاء لحماية شبابنا وضرورة تطبيق القانون"، تحت شعار "حتى ما يكون روي ذكرى"، والتي نظمتها ثانوية القلبين الاقدسين - عين نجم، حيث كان روي حاموش طالباً على مقاعدها لـ 15 عاماً.